Wojerecy (AK/SN). Za něhdźe 550 000 eurow chce město Wojerecy naměsto mjez Łužiskej halu a Łužiskim centerom ponowić. Tole je snadna wjetšina měšćanskeje rady na wčerawšim posedźenju wobzamknyła. „Z Łužiskim naměstom a tamnišimi wikami drje budźemy so hišće dołho zaběrać“, zjima wyši měšćanosta Stefan Skora (CDU) wčera kontrowersnu diskusiju.

Łužiske naměsto dyrbja ponowić, dokelž je chětro dodźeržane a dźensnišim wěstotnym žadanjam hižo njewotpowěduje. Wukłasć chcedźa naměsto, kotrež ma dale bjez zadźěwkow wostać, z wulkimi betonowymi plesternakami. Na sedźenskich móžnosćach, na wobswětlenju a na wotwodźowanju dešćikoweje wody ničo njezměnja. Za to pak dyrbja štomy podrězać a nowe sadźić.