Bart (SN/MWj). Mjeztym hižo 24. raz wotměje so swjatki póndźelu, 5. junija, němski dźeń młynow. Na nim so lětsa dohromady 1 100 młynow a wětrnikow wobdźěli. Někotre z nich budu tež w Hornjej Łužicy přistupne.

Tak so tónraz Bartski wódny młyn druhi króć na tejle akciji wobdźěli. Tam móža so wopytowarjo na wodźenjach wobdźělić a dožiwić, kak běchu něhdy zorno mlěli a tołkali. Wot 13 hodź. poskića jězby z ponyjowym zapřahom. Wězo budźe tež wo ćělne derjeměće postarane. W Bartskim młynje móžeš zarjadowanja za hač do 25 wosobow přewjesć.

Hižo wjele lět wobdźěla so Fehrmannec młyn w Koblicach w Hodźijskej gmejnje na dnju młynow a wuhotuje tón dźeń přeco swój młynski swjedźeń.

Dale wobhladać móža sej zajimcy Ryhelowy młyn w Njechornju, hdźež z mocu wody zorno tołkaja.