Tołsta mróčel procha ze skały přišła

pjatk, 02. junija 2017
artikl hódnoćić
(0 )

Malešecy (CS/SN). Dypki dnjoweho porjada, kotrež so z rjedźenjom a wudawanjom jědźe we wšelakich dźěćacych zarjadnišćach Malešanskeje gmejny zaběrachu, dyrbjachu na zašłym posedźenju gmejnskeje rady z dnjoweho porjada šmórnyć. Namjetej gmejnskeho radźićela dr. Jürgena Wenglera po dlěšej diskusiji přihłosowachu. Pozadk běchu wobmyslenja wjacorych wobydlerjow, hač ma so gmejna po prawniskich předpisach.

Potrjecheni sobudźěłaćerjo, kotřiž běchu dotal pola gmejny přistajeni, maja we wobłuku „personalneho přechoda“ do eksterneje firmy přeńć. Gmejna wopodstatnja to z tym, zo ma kóšty lutować. Sobudźěłaćerjam su přilubili, zo jich w přichodnymaj lětomaj w samsnych objektach zasadźa kaž dotal, zo změja garantiju přistajenja a zo dóstanu w přichodnymaj lětomaj samsnu mzdu. Kaž pak dyrbješe wjesnjanosta Matthias Seidel (CDU) na wotpowědne prašenje z wobydlerstwa přiznać, njeje zaručene, zo potrjecheni snano krućiši časowy plan njedóstanu. To móhło woznamjenjeć, zo dyrbja za samsnu mzdu dlěje dźěłać. Nimo toho woby­dlerjo dwěluja, hač scyła wobzamknjenje gmejnskeje rady­ wo tym předleži.

Dalša kritika wobydlerjow na posedźenju radźićelow měrješe so na firmu Pro Stein, kotraž Plusnikečansku skału wobhospodarja. Poćežowanje z prochom tam dźeń a bóle přiběra. Hakle njedawno je wulka mróčel procha wjes poćežowała. W tajkim padźe, Seidel znapřećiwi, dyrbjeli so wobydlerjo na wobswětowy zarjad wokrjesa wobroćić. Tam pak pjatk popołdnju zawěsće nikoho njedocpěješ. Tohodla dyrbjeli wjesnjenjo tajke pady z fotom abo widejofilmom dokumentować. Seidel wobžarowaše, zo ma gmejna lědma móžnosće, Plusnikečanske předewzaće Pro Stein w zmysle wobydlerjow wobwliwować.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND