Budyski wokrjes nětko spěchowanje 3,5 dalšich městnow přizwolił
Budyšin (SN/mwe). W něhdyšim Budyskim Sprjewinym hotelu přebywa tuchwilu přerěznje 70 požadarjow azyla a připóznatych ćěkancow w přerěznej starobje 29 lět. Połojca z nich, přewažnje ze Syriskeje, Iraka a Afghanistana, su swójby. Tamna połojca su młodźi mužojo, kotřiž runja swójbam w Budyšinje a wokolinje bydlenje, wukubłanje a dźěło pytaja.
Integraciski dom, kaž so bywši azylowy dom wot srjedź julija mjenuje, spěchujetej Budyski wokrjes a Swobodny stat Sakska. Wjacori přistajeni so tam wo wobydlerjow staraja. 1. oktobra je Budyski wokrjes spěchowanje 3,5 městnow přizwolił, z čimž skutkowanje nazhonitych přewodnikow podlěši. Peter-Kilian Rausch, kwartěrowy manager, Serbskim Nowinam praji, zo je to za integraciski proces njeparujomne. Spěchowanje je hač do kónca lěta wobmjezowane. Što klětu budźe, wón njewě. „Nadźijam so, zo móžemy ze započatym pokročować.“
