Staršiski popłatk wot měrca dróši

štwórtk, 30. nowembera 2017
artikl hódnoćić
(0 )

Budyšin (CK/SN). Za hladanje swojich dźěći w dnjowych přebywanišćach změja starši w Budyšinje wot 1. měrca 2018 wjace płaćić. Tole su měšćanscy radźićeljo wčera z dwěmaj napřećiwnymaj hłosomaj a jednym wzdatym wobzamkli. Za dźewjeć hodźin w žłobiku wučinja měsačny staršiski podźěl potom 209,33 eurow a tuž 7,08 eurow wjace hač dotal. Za dźewjeć hodźin w pěstowarni změja starši 128,45 eurow na měsac płaćić – 3,92 eurow wjace. Za šěsć hodźin w horće zwyši so płaćizna wo 1,42 na 73,72 eurow. Za spěchowanski hort dyrbja starši hišće hłubšo do móšnje přimnyć. Tam podróši so hladanje wo 19,51 na 82,13 eurow. Wot třećeho dźěsća w jednym zarjadnišću starši scyła ničo płaćić njetrjebaja. To je nowe a wotpowěduje prócowanjam radźićelow a swójbneje rady města. To njeje jeno symbol, rjekny socialny měšćanosta Robert Böhmer. Wón wobhladuje to tež jako powabk, wšako bě lońša kwota porodow w Budyšinje z 2,2 sobu najwyša po wšej Němskej.

Płaćizny přiměrić je trjeba stupacych wobhospodarjenskich kóštow dla. Robert Böhmer wuzběhny, kak wěcownje su so měšćanscy radźićeljo z komplikowanej temu zaběrali. Za Lěwicu bě „spagat mjez komunalnej potrěbnosću a socialnym narokom wosebje ćežki“. Radźićeljo tejele strony drje su namjetej přihłosowali, wostanu pak při swojim zaměrje, zo měło hladanje dźěći za staršich darmotne być, praji předsydka frakcije Angela Palm, kotraž zastojnstwo strowotnych přičin dla woteda. Jeje naslědnik Steffen Grundmann rjekny, zo tónle zaměr njeje njerealistiski, kaž je na přikładźe Delnjeje Sakskeje widźeć. „Idealne by było popłatk staršich po jich mzdźě wobličić, ale to w Sakskej móžno njeje“, praji Roland Fleischer (SPD). Kaž Mike Hauschild (FDP) měnješe, darmotny wopyt třećeho dźěsća žadyn wuspěch njeje. W swójbach z třomi dźěćimi zwjetša jenož dwě do dnjoweho přebywanišća chodźitej. Za to pak žane wuswobodźenje staršiskeho přinoška předwidźane njeje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND