Kónc lěta wróćo zhladuješ a dopominaš so rady na wulkotne dožiwjenja. Wosebite wjerški, skedźbnjace na wjelelětne stawizny, su jubilejne zarjadowanja a swjedźenje. Na wosebitu róčnicu móžachu Pěskečenjo lětsa zhladować.
Pěskecy (aha/SN). Druhi swjaty dźeń hód po nyšporje so Pěskečenjo dopominachu, zo maja swoju kapałku mjeztym 25 lět. Wot 1992 je tele městno duchowne srjedźišćo wsy.
Hižo w NDRskim času zrodźichu někotři wjesnjenjo ideju, sej kapałku natwarić. Jich předstawy pak tehdy wězo wotpokazachu, a hakle po přewróće po jutrach 1991, dóstachu twarsku dowolnosć. Agilny kwartet– Jan Smoła, Beno Pólk, mjeztym njeboh Beno Lipič a Jan Matka – přewza nawod twarskich dźěłow, organizatoriski wotběh kaž tež zasadźenje ćěslow a mulerjow. Wšědnje dźěłajo a kóždu sobotu wužiwajo natwarichu nahladny Boži dom. Cyła wjes je při twarje po swojich mocach pomhała. Mějićeljo lěsow běchu darmotnje trěbne drjewo přewostajili, a w NDRskim času za twar konsuma přihotowany material bu sobu wužiwany.
