Tradicionalne pohodowne zarjadowanje dobry wothłós žnjało
Radwor (CRM/SN). Pisany a wotměnjawy hodowny koncert poskići minjeny pjatk chór Meja na Radworskej wjesnej žurli. Charakteristiske za tele tradicionalne zarjadowanje najstaršeho serbskeho spěwneho ćělesa je, zo njesteja na jewišću jenož čłonojo chóra, ale tež dalši kulturnje aktiwni. Tónraz překwapichu šulerjo z někotrymi basnjemi. A činjachu to k wjeselu připosłucharstwa z hłowy, štož jim publikum z wosebitym přikleskom honorowaše.
Zajima zbudźi tohorunja pišćałkowe duwo ze Sofiju Hančikec a Hanu Nukec. Na gitarje hraješe Milena Wowčerjec. Tak so zdobom na to pokaza, kak wažnu rólu za wuměłski dorost hraje tu wokrjesna hudźbna šula, w kotrejž mali a trochu wjetši wuměłcy na instrumentach hrać wuknu.
Wosebity hósć wječora bě Měrćin Weclich. Jako jara nazhonity entertainer zaspěwa wón někotre ze swojich woblubowanych songow, zdobom so Kukowčan sam instrumentalnje přewodźeše. Tak zdoby sej młodych kaž tež staršich wopytowarjow za sebje a swoje wuměłstwo.