Chór Meja zaso koncertował

wutora, 02. januara 2018
artikl hódnoćić
(0 )
Na žurli Radworskeho hosćenca je chór Meja minjeny pjatk swój kóždolětny hodowny koncert wuhotował. Nimo někotrych šulerjow  bě Měrćin Weclich hłowny hósć wječora.  Foto: Bosćij Handrik Na žurli Radworskeho hosćenca je chór Meja minjeny pjatk swój kóždolětny hodowny koncert wuhotował. Nimo někotrych šulerjow bě Měrćin Weclich hłowny hósć wječora. Foto: Bosćij Handrik

Tradicionalne pohodowne zarjadowanje dobry wothłós žnjało

Radwor (CRM/SN). Pisany a wotměnjawy hodowny koncert poskići minjeny pjatk chór Meja na Radworskej wjesnej žurli. Charakteristiske za tele tradicionalne zarjadowanje najstaršeho serbskeho spěwneho ćělesa je, zo njesteja na jewišću jenož­ čłonojo chóra, ale tež dalši kulturnje aktiwni. Tónraz překwapichu šulerjo z někotrymi basnjemi. A činjachu to k wjeselu připosłucharstwa z hłowy, štož jim publikum z wosebitym přikleskom honorowaše.

Zajima zbudźi tohorunja pišćałkowe duwo ze Sofiju Hančikec a Hanu Nukec. Na gitarje hraješe Milena Wowčerjec. Tak so zdobom na to pokaza, kak wažnu rólu za wuměłski dorost hraje tu wokrjesna hudźbna šula, w kotrejž mali a trochu wjetši wuměłcy na instrumentach hrać wuknu.

Wosebity hósć wječora bě Měrćin Weclich. Jako jara nazhonity entertainer zaspěwa wón někotre ze swojich woblubowanych songow, zdobom so Kukowčan sam instrumentalnje přewodźeše. Tak zdoby sej młodych kaž tež staršich wopytowarjow za sebje a swoje wuměłstwo.

Cyle dostojny bě tež tónraz hodowny program Mejanow pod nawodom Pětra Cyža. K woblubowanym serbskim pěsnjam, kotrež nochcyło připosłucharstwo nihdy nanihdy parować, zaklinča to a tamne hižo zabyte abo tež cyle znowa nazwučowane. Tak bě zajimawe słyšeć, kak spěwčk „Riu riu chiu“ ze šwedskeho Uppsala w serbskim kraju skutkuje abo kak pólski hodowny spěw „Mizerna cicha“­ ze serbskich ertow klinči.

W moderaciji skedźbni Beno Bělk na někotružkuli zajimawostku. Mjez druhim wón na to pokaza, zo mamy w serbskim wobłuku tři wersije za na cyłym swěće najznaćišu hodownu pěseń „Ćicha nóc“. Tež sobumoderatorce Mónika Wenclowa a Lydija Zopina něštožkuli zajimaweho­ přidaštej, štož je předewšěm wušej zwjazanosći mjez chóristami,­ dalšimi­ akterami na jewišću kaž tež připosłuchacymi­ wjesnjanami a hosći z druhich kónčin bjezdwěla tyło.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND