Personalna debata łoskoćiwa

pjatk, 05. januara 2018
artikl hódnoćić
(0 )

Ćežki kompromis mjez měšćanskimi radźićelemi a zarjadnistwom

Budyšin (CK/SN). Nowe lěto zahaja město Budyšin ze solidnym etatom. Mjeztym zo wučinjeja dochody 75,2 milionaj eurow, změje wone wudawki 77,2 milionow eurow. Deficit wopodstatnja zarjadnistwo z přiběracymi wudawkami za hladanje twarjenjow a za wobhospodarjenske kóšty, za čož zaplanuja 14,8 milionow eurow. Nimo toho z tym liča, zo wotedawk wo­krjesej bytostnje rozrosće. 16,6 milionow eurow wudadźa za zastaranje dźěći.

Najwjetši jednotliwy dypk etata 2018 su personalne kóšty 23 milionow eurow. Runja zašłym lětam so čłonojo měšćanskeje rady na tymle dypku postorkuja. Po słowach předsydy frakcije CDU Karstena Vogta ličba personala hižo wjacore lěta přiběra. W meji 2017 běštej frakciji CDU a FDP tohodla namjetowałoj, organiza­cisku strukturu měšćanskeho zarjadnistwa přepruwować. W hospodarskim planje 2018 předwidźi zarjadnistwo personalny wobjim 389,6 połnych dźěłowych městnow, w kotrychž su pěstowarnje sobu zapřijate. Financny měšćanosta dr. Robert Böhmer wobkrući pjeć zapři­jatych nowych městnow z přidatnymi nadawkami měšćanskich zarjadnišćow a z inwesticijemi. „Z tym, zo personal kategorisce přitřihamy, njeje nikomu pomhane. To přinjese jenož njespokojnosć“, Böhmer potwjerdźi. Nimo toho je chorobny staw chětro wulki. Tole pak nochcyše Mike Hauschild (FDP) jako argument za nowopřistajenja płaćić dać.

We hłownym wuběrku měšćanskeje rady dojednachu so na kompromis, zo matej so městnje managera za prózdne domy a managera za měšćanski marketing šmórnyć. Dojednali su so na 2,2 přidatnej městnje. Zo bě w naćisku hospodarskeho plana potom 2,7 zapisane, štož by přidatne kóšty pjećcyfroweje sumy wučinjało, začuwachu někotři radźićeljo na swojim zašłym posedźenju jako łamanje dowěry. Sčasami nasta tam zaćišć, zo by so hospodarski plan personalneje debaty dla puknył. Na to prošeše frakcija CDU wo přestawku.

„Zarjadnistwo dźěła na hornjej hranicy swojeje zamóžnosće“, rjekny předsyda frakcije SPD Roland Fleischer. Přirunujo ze starymi zwjazkowymi krajemi maja sakske komuny najniše personalne kóšty na tysac wobydlerjow. Wyši měšćanosta Alexander Ahrens (SPD) namjetowaše, so poł městna wzdać a tele techniske dźěła we wobłuku pěstowarnjow eksternje rozdawać. Tomu měšćanscy radźićeljo přihłosowachu. Runočasnje sej woni žadachu, zo ma zarjadnistwo lětsa swoju strukturu přepruwować dać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND