Loni 16 000 ludźi Stróžanski Dom tysac hatow wopytało
Stróža (SN/mwe). Loni su w Stróžanskim Domje tysac hatow něhdźe 16 000 wopytowarjow zličili. „To bě dobra sezona, wosebje wot apryla do oktobra“, zdźěla na naprašowanje Serbskim Nowinam sobudźěłaćerka biosferoweho rezerwata Hornjołužiska hola a haty Christina Schmidt. „Nadźijamy so wězo hišće wjace zajimcow, za to pak dyrbi so naš dom nadregionalnje znaćiši stać. Wot oktobra 2017 słušamy ke ‚knylerej Hornjeje Łužicy‘, štož zawěsće dale a wjace pućowacych tež z wukraja přiwabi.“ Loni w měrcu bě Dom tysac hatow pjeć lět wotewrjeny. Hač do toho je jón něhdźe 75 000 ludźi wšěch generacijow we wobłuku najwšelakorišich zarjadowanjow wopytało. Lětsa wočakuja stotysacteho hosća.