35 drastow w 25 wobchodach

srjeda, 21. měrca 2018
artikl hódnoćić
(0 )

„Jutrowne město“ změje tež lětsa wjele poskitkow

Budyšin (CS/SN). Najwjace turistow přichadźa jutry do Łužicy a rady do Budyšina. Zo bychu jich wočakowanja spjelnili, ćahnu organizatorojo za jedyn postronk. Minjene lěta su swoje poskitki dale wothłosowali a polěpšili. Hdyž wočakowanych 40 000 wopytowarjow jutry Budyskich křižerjow widźi, chcedźa woni tež něšto wo pozadkach wědźeć. Tohodla Bjarnat Cyž jako křižer w Serbskej kulturnej informaciji lětsa zaso nadrobnosće rozłoži, a to ćichu sobotu. Zo bychu hosćo prawy puć namakali, w nutřkownym měsće na chódnikach stopy wupołoža. Tohorunja sobotu budu štyri šulerki Serbskeho gymnazija w štyrjoch wariantach narodneje drasty po měsće po puću, zo bychu na prašenja hosći za serbskej kulturu wotmołwjeli a jim flajery z pokazku na program Serbskeho ludoweho ansambla „Moja reja“ wudźěleli.

Serbska narodna drasta budźe tež we wukładnych woknach wobchodow widźeć. Kaž cityjowa managerka Gunhild Mimuß praji, je to za šwalče SLA wjele dźěła, figuriny zdrasćić. Dohromady budźe w 25 wobchodach 35 rozdźělnych wariantow narodneje drasty widźeć. Wěcywustojne wopisanje je Serbski institut zdźěłał. Kaž móžeše cityjowa managerka wobkedźbować, so jutrowni wopytowarjo za drastu wulce zajimuja.

Ćichu sobotu smědźa wobchody wot 10 do 16 hodź. wočinić. Dokelž su po nazhonjenjach zašłych lět hosćency jutry zwjetša přepjelnjene, wutworja na Žitnych wikach takrjec zetkawanišćo, hdźež móžeš so při wšelakich stejnišćach posylnić. Tež za dźěći změja tam poskitki.

Jutrowničku po wotjěchanju Budyskich křižerjow wotměje so na Hrodźišku jejkakulenje z Jejkowym Handrijom Heikom Harigom. Tež tam budu pisane wiki. Program wuhotuja dźěćaca rejwanska skupina SLA „Łužičanka“, NSLDź z klankohru, rejwanska šula Mühlmann a młodźinski dujerski orchester. Wolfgang Kraus jako Krabat chce wopytowarjow předewšěm na swój historiski přikład Janka Šajatovića skedźbnić. Nimo toho pokaza wón na aktualnu wustajeńcu w Serbskim muzeju, kotruž 15. apryla z Krabatowym swjedźenjom na tudyšim Hrodźe zakónča.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND