Rychwałd (CK/SN). Wot zašłeho tydźenja saněruja móst nad Młynskej hrjebju w Rychwałdźe w Hamorskej gmejnje. Sobudźěłaćerjo Hórčanskeho Wehnertec zawoda započachu tam stare deski wotstronjeć. Na jich městno połoža platu z wocloweho betona. Spočatk junija ma wšitko hotowe być.
Spočatk februara bě Hamorska gmejnska rada projekt wobzamknyła. Po wupisanju na internetnej platformje „Evergabe“ so sydom zawodow za tónle nadawk zajimowaše. Štyri z nich swój poskitk wotedachu. Najpřijomniši předpo- łoži Wehnertec firma. Za 118 000 eurow wona nadawk nětko zwoprawdźa. Spočatnje bě za to jenož 89 000 eurow předwidźanych. Wudawki pak běchu hižo před dlěšim časom kalkulowali. Mjeztym su płaćizny chětro rozrostli, rěka z Hamorskeho gmejnskeho zarjadnistwa. Tohodla z wupisanjom ekstra hač do zymskeho časa čakachu a so nadźijachu, zo budu płaćizny potom zaso něšto přijomniše. Tomu pak tak njeje. Gmejnscy radźićeljo stejachu tuž před rozsudom, nadawk přiwšěm přepodać abo jón podróšenja dla cofnyć, zo bychu pozdźišo snano přijomnišeho poskićerja namakali.