K parnej lokomotiwje maja nětko tež knihu

pjatk, 23. měrca 2018
artikl hódnoćić
(0 )
Wuchodosakscy přećeljo železnicy ze swojim předsydu Alfredom Simmom  (na wobrazu) su mjeztym hordy wobsedźer Budyskeje muzejoweje parneje lo komotiwy a jej słušaceje wužiwanskeje knihi.  Foto: Uwe Menschner Wuchodosakscy přećeljo železnicy ze swojim předsydu Alfredom Simmom (na wobrazu) su mjeztym hordy wobsedźer Budyskeje muzejoweje parneje lo komotiwy a jej słušaceje wužiwanskeje knihi. Foto: Uwe Menschner

Budyšin/Lubij (UM/SN). Wuchodosakscy přećeljo železnicy du z połnym programom do noweje sezony. Towarstwo, kotrež je swoje sydło z Budyšina do Lubija přepołožiło, poskići lětsa 15 wosebitych jězbow. Wone powjedu mjez druhim k festiwalej R.S.A. do Schwarzenberga (2. junija), do filmoweho města Babelsberga (15. septembra), k Wochožanskej brunicowej jamje (25. septembra) a samo do čěskeje Mladeje Boleslavy (16. oktobra). Do­społny program nadeńdu zajimcy pod www.osef.de. Loni je něhdźe 5 500 poskitki wužiwało.

Za swoje jězby zapřahnu nimo wupožčenych lokomotiwow swójsku dieselowu lokomotiwu kaž tež jako „Ferkeltaxe“ znate wozy z produkcije NDR. Nimo toho wobsedźi towarstwo dwě parnej lokomotiwje, kotrejž pak tuchwilu njejězdźitej. „Naša 52 80 80-5 wot lěta 2013 steji, dokelž by tehdy trěbne hłowne přepytowanje poł miliona eurow płaćiło. Telko pjenjez njemóžachmy zwjesć“, wuswětla předsyda towarstwa Alfred Simm. Hač za to přichodnje snano raz spěchowanske srědki dóstanu, njeje wěste.

Do wobstatka towarstwa słuša nětko tež sławna Budyska parna lokomotiwa 52 80 56-5, kotruž běchu loni w spektakularnej akciji z Budyskeho dwórnišća na nowe městno přesadźili. Mjeztym je tež wužiwanska kniha lokomo­tiwy we wobsydstwje železniskich přećelow. „Na eBay bě ju něchtó ilegalnje poskićił. To je nam napadnyło a smy wo tym Němsku železnicu informowali. Ta je poskićowarja na to skedźbniła, zo wón cuze wobsydstwo přesadźuje. A tak je knihu spěšnje wróćił“, so Alfred Simm wjeseli. Wón so nětko nadźija, zo we ­wobłuku towarstwa přećelow železnicy zajimowe zjednoćenstwo załoža, kotrež muzejowu lokomotiwu do swojeje zamołwitosće přewozmje, přetož „na lo­komotiwje je wjele dźěła“.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND