Přihotuja nowu załožbu

póndźela, 26. měrca 2018
artikl hódnoćić
(0 )

Gmejnska rada wo daloko sahacych rozsudach jednała

Njebjelčicy (JK/SN). Z wobšěrnymaj projektomaj, kotrejž změjetej njemały wliw na žiwjenje w Njebjelčicach a wokolinje, zaběrachu so tamniši gmejnscy radźi­ćeljo na swojim minjenym posedźenju. Po dlěšich přihotach móžeše Sven Köh­ler z planowanskeho běrowa Heinrich předstajić projekt, z kotrymž chce sakski zarjad za wobhospodarjenje rěčnych zawěrow něhdyši spjaty jězor njedaloko Njebjelčic wutwarić jako naprawu k škitej před wulkej wodu. Jara naročny projekt zwjaza nadawki škita před wulkej wodu z přirodoškitnymi žadanjemi podłu Jaworskeje rěčki. Z mnohimi dokumen­tami zamó zastupjer planowanskeho běrowa radźićelam derje do krajiny so hodźacy projekt spřistupnić. Projekt, kotryž ma hižo wobstejace naprawy na městnje zapřijeć, chcedźa po móžnosći hišće lětsa nazymu zahajić a hač do kónca lěta 2019 wotzamknyć. Wšitcy woby­dlerjo gmejny pak wo trěbnosći tajkeho wulkeho předewzaća na teritoriju komuny přeswěd­čeni njejsu, štož so na posedźenju wu­jewi.

Hižo njewužiwane tři chlěwy Njebjelčanskeje plahowarnje rancow chcedźa młodźi inwestorojo wužiwać, zo bychu tam garnele plahowali. Friedrich Tietze, nawoda skupiny załožerjow eksistency, agěrowacych pod mjenom SUBURBAN Seafood, předstaji njewšědny projekt a jeho zaměr. Předewzaće chce wot lěta 2019 produkować lětnje 100 tonow wulkich garnelow (Weißbandgarnele). Trěbne zarjadniske kroki za přihot inwesticijow a produkcije su hižo zmištrowali. Nětko trjebaja hišće porjadny financny zakład za swoju poměrnje wobšěrnu inwesticiju. Wjesnjanosta Tomaš Čornak (CDU) připraji młodym předewzaćelam podpěru a wuhlad na spěchowanske srědki. Za předwidźany projekt dyrbjachu wobtwarjenske wustawki za Lindach změnić. Te je gmejnska rada wobzamkła, a podłožki su zjawnje wupołožene.

Bohatstwo gmejny do přichoda zachować chcedźa w Njebjelčicach z pomocu komunalneje załožby. Jeje zaměr dyrbjał być, wobhospodarić 30 hektarow gmejnskich ležownosćow, kotrež je gmejna w běhu minjenych lět nakupiła, a tak dołhodobnje zaručić naslědnym generacijam wěstotu financowanja gmejnskich předewzaćow. Radźićeljo wobzamknychu, zahajić proces k załoženju tajkeje załožby. To pak trjeba čas a ma so swědomiće přihotować. Prócowanja k załoženju załožby podpěruje poradźowar gmejny Johannes Heimrath z wobšěrnymi nazhonjenjemi na komunalnym polu.

Derje postupuja přihoty za wutwar rumnosćow šulskeho horta w Njebjelčicach. Z běrowa managementa Leaderoweho regiona w Rakecach dósta gmejna wobšěrne spěchowanje projekta připrajene. Jako dobre so wopokaza, zo njeje trjeba změnić zachod twarjenja, štož so derje na twarske kóšty wuskutkuje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND