Nalěćo dźěłowe wiki wožiwja

wutora, 03. apryla 2018
artikl hódnoćić
(0 )

Kaž wočakowane je ličba bjezdźěłnych w Hornjej Łužicy w měrcu woteběrała. Z toho pak njeprofituja wšitcy. Tež regionalnje wobsteja dale wulke rozdźěle, kaž statistika wotbłyšćuje.

Budyšin (CK/SN). Po zymskej přestawce je na dźěłowych wikach zaso wjace žiwjenja. To rjekny Ilona Winge-Paul, operatiwna jednaćelka Budyskeje agentury ­za dźěło, jako nowinarjam tele dny najnowše ličby bjezdźěłnych prezentowaše. W měrcu bě 21 512 žonow a muži bjez dźěła přizjewjenych. To bě 548 mjenje hač w februaru a 2 539 mjenje hač w samsnym času loni. Bjezdźěłnostna kwota wučinja za cyłu wuchodnu Saksku 7,6 procentow. W jednotliwych regionach pak je wona dale jara rozdźělna a saha wot 4,1 procenta we wobłuku Kamjenc/Radeberg přez 6,5 procentow w Budyšinje a 8,7 procentow we Wojerecach hač k 12,4 procentam w Zhorjelcu. To pokazuje, zo wobsteja mjez wokrjesomaj Hornjeje Łužicy wulke rozdźěle. Regionalnje widźana je bjezdźěłnosć w měrcu we wšitkich wotnožkach dźěłoweje agentury woteběrała. Přiwšěm njemějachu wšitke skupiny wobydlerjow w samsnej měrje podźěl na nalětnim wožiwjenju na dźěłowych wikach. W skupinje młodych ludźi pod 25 lětami bě 29 bjezdźěłnych wjace registrowanych hač w februaru. Wot bjezdźěłnosće po­trjechenych bě pjeć ćežkozbrašenych wjace a tež 38 wukrajnikow wjace, kaž Ilona Winge-Paul zdźěli.

W Hornjej Łužicy je tuchwilu 4 370 swobodnych dźěłowych městnow z winowatostnym socialnym zawěsćenjom. Najwjace poskitkow, mjenujcy 920 městnow, maja we wobłuku nachwilneho dźěła. W předźěłacym přemysle pytachu 885 nowych sobudźěłaćerjow, w strowotnistwje a socialnistwje 450, w twarstwje 387. Runje poslednja mjenowana ličba je po słowach Ilony Winge-Paul wuraz nalětnjeho wožiwjenja a znamjo, zo maja tež zaso dosć dźěła w tych branšach, kotrež wonka dźěłaja.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND