Peticija žada sej cofnjenje rozsuda wo přemjenowanju dróhow
Łaz (AK/SN). Dwojenju nadróžnych mjenow chce Łazowska gmejna w přichodźe zadźěwać a ma so tuž dale po swojim wobzamknjenju wo přemjenowanju nadróžnych mjenow ze 6. junija 2017. Tole podšmórny wjesnjanosta Thomas Leberecht (CDU) na zašłym posedźenju gmejnskeje rady. Wón wotmołwi tak na peticiju wobydlerjow. „Smy něhdźe 670 podpismow zběrali. 93 procentow naprašowanych bě přećiwo přemjenowanju. To rěči jasnje za našu naležnosć“, rjekny sobuorganizator Henry Frenzel z Mortkowa.