Lisćiki za rockowe legendy dobyć

póndźela, 23. apryla 2018
artikl hódnoćić
(0 )
Claudius Dreilich, Dieter „Maschine“ Birr a Tony Krahl (wotlěwa) kaž tež jich hudźbni kolegojo steja swjatkownu sobotu, 19. meje, jako rockowe legendy na jewišću Kamjenskeje Pastwineje hory.  Foto: Uwe Menschner Claudius Dreilich, Dieter „Maschine“ Birr a Tony Krahl (wotlěwa) kaž tež jich hudźbni kolegojo steja swjatkownu sobotu, 19. meje, jako rockowe legendy na jewišću Kamjenskeje Pastwineje hory. Foto: Uwe Menschner

19. meje wustupi dohromady 17 hudźbnikow na Kamjenskej Pastwinej horje, a to w znatych kaž tež nowych formacijach. Wopytowarjo smědźa so na wosebity wječor wjeselić.

Kamjenc (UM/SN). Rockowe legendy přińdu! Tole w Kamjencu na wosebite wašnje klinči, wšako steješe jedna z nich, bywši Puhdy Dieter „Maschine“ Birr tule hižo njeličomne razy na jewišću. Wot lěta 2014 jězdźa wón, Tony Krahl z kapały City a čłon kapały Karat Cornelius Dreilich jako rockowe legendy přewažnje po wuchodnej ­Němskej. Štwórty je Matthias Reim. „Ideja, Matthiasa sobu zapřijeć, je so nam wot wšeho spočatka lubiła. Mějachmy zaćišć, zo so to hodźi“, powěda Tony Krahl. „Matze“ Reim drje pochadźa ze „šlagroweho róžka“, jeho pak móžachu sej tež derje jako rockera předstajić. Dotalne zhromadne wustupy tule prognozu wobkrućeja, rjekny producent Rolf Henning.

Pola rockowych legendow su hranicy mjez skupinami tak a tak zamazane. Kapała Dietera Birra, w kotrejž mjez druhimi Jörg Weißelberg, z Lubija pochadźacy gitarist a mandźelski Jeanette Biedermann, sobu hraje, přewodźa tohorunja Matthiasa Reima, kiž bjez swójskeje kapały přijědźe. Tež gitarist skupiny Silly Uwe Hassbecker steji sobu na jewišću. Wón prezentuje so jako husler a zahraje hromadźe z Georgijom Gogowom wot City. Pola Karat staj Michael Schwandt a Bernd Römer z časa NDR pódla. A pola City hraja nimo Tonyja Krahla wězo Fritz Puppel, Klaus Selmke a Manfred Henning, kotřiž su mjeztym wšitcy rentnarsku starobu docpěli.

Dohromady 17 hudźbnikow hudźi w rozdźělnych zestawach. Tajke tam a sem na jewišću je něšto wosebite. Na te wašnje pak dožiwi publikum třihodźinski koncert bjez přetorhnjenja, dokelž ma kóždy hudźbnik tež swoju přestawku. A hdyž Matthias Reim swoje title zaspěwa, rozběža so tež hranicy mjez šlagrom a rockom.

Jewišćo na Pastwinej horje jako „mała sotra Berlinskeho lěsneho jewišća“, kaž je Dieter Birr mjenuje, skića wopytowarjam kaž tež wuměłcam „jónkrótny rjany flair“. Wuhlad, zo ma so backstage-wobłuk ponowić, jeho ze stólca njetorhnje. „Lubuju něšto tak nadeńć, kaž to znaju“, so wón sćicha posměwknje. Producent Rolf Henning porno tomu na to pomysli, zo maja njecyły měsac do koncerta w Kamjencu hišće něšto stow zastupnych lisćikow. „Předań njeje cyle tajka, kaž smy to zwučeni.“ „To pak zawěsće hišće budźe“, je sej Dieter Birr wěsty.

Za koncert rockowych legendow swjatkownu sobotu, 19. meje, přewostajeja Serbske Nowiny dwójce dwaj zastupnej lisćikaj. Štóž chcył je měć, njech napisa nam hač do pjatka, 27. apryla, mailku pod abo kartu redakciji Serbskich Nowiny, Sukelnska 27, 02625 Budyšin. Mjez wšitkimi wotpósłarjemi dwójce dwaj lisćikaj wulosujemy.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND