Z nowym mostom kónc dołhich wokołopućow

póndźela, 16. julija 2018
artikl hódnoćić
(0 )
Krajny rada Michael Harig, Michael Kretschmer, Alojs Mikławšk, Kathrin Piller a aba tisa Gabriela Hesse (wotprawa) su banćik přetřihali.  Foto: SN/Maćij Bulank Krajny rada Michael Harig, Michael Kretschmer, Alojs Mikławšk, Kathrin Piller a aba tisa Gabriela Hesse (wotprawa) su banćik přetřihali. Foto: SN/Maćij Bulank

Pančicy-Kukow (SN/MWj). Kaž mały ludowy swjedźeń bě minjeny pjatk pře­podaće noweho mosta nad Klóšterskej wodu w Pančicach-Kukowje a ponowjeneje statneje dróhi S 100. Něhdźe pjećstow ludźi ze wsy a z wokoliny chcyše po­dawk sobu dožiwić. Dźěći Pančičanskeje pěstowarnje předstajichu w serbskej narodnej drasće dwurěčny program.

Jednaćel towaršnosće za wobchad a inženjerske posłužby LISt Frank-Hermann Göpfert dopominaše na to, zo běchu před lětomaj projekt planować započeli, w nowembru 2016 prěni dźěl puća ponowili a loni w meji nowy móst twarić započeli. Dohromady su w Pančicach-Kukowje 1,6 milionow eurow inwestowali.

Sakski ministerski prezident Michael Kretschmer (CDU) žortowaše, zo chcyše poprawom sud piwa ze swojim předchadnikom Stanisławom Tilichom wudać. Tón pak w tym času we wuhlowej komisiji „na suchim sedźi“.

Zastupowaca wjesnjanostka Kathrin Piller je přitomnych tež serbsce witała. Wona wuzběhny, zo bě twarski projekt za wobydlerjow wulke wužadanje, dokelž mějachu woni nimo hary a procha tež kilometry dołhe wokołopuće znjesć, z čimž je nětko na zbožo kónc. Na gmejnu pak čakaja dalše nadawki. Tak naliči Kathrin Piller dalše dźěła w šuli kaž tež ponowjenje sportownje. Wosadny farar Měrćin Deleńk nowy móst požohnowa a zakantori kěrluš „Budź chwała Bohu wěčnemu“. Wšón čas čakaše před „Karstenowej piwowej stwičku“ stary Wartburg, zo móhł jako prěni po přepodatym mosće jěć, štož so jemu skónčnje tež poradźi. Jako dźak za znjesene wobćežnosće běchu wobydlerjo takrjec k wječeri přeprošeni a dachu sej steak, kołbasku a piwo darmotnje zesłodźeć. K tomu zahudźi kapała Fünf an der Feier.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND