Hnydom dźěło njenašli

štwórtk, 02. awgusta 2018
artikl hódnoćić
(0 )

Ličba bjezdźěłnych w Hornjej Łužicy je w juliju lochce stupała. To wšak ­bě Budyska agentura za dźěło tež tak wočakowała.

Budyšin (CK/SN). W juliju bě w Hornjej Łužicy 18 990 žonow a muži bjezdźěłnych. To je 159 wjac hač měsac do toho. Kaž wočakowane, je tuž bjezdźěłnosć w regionje lochce přiběrała, dokelž njebuchu mnozy młodźi ludźo, kaž hižo ­minjene lěta tež, po wukubłanju přewzaći. Za přičinu, so znjeměrnić dać, pak to nawoda Budyskeje agentury za dźěło Thomas Berndt nima. „Dźěłowe wiki su robustne a přijimanjakmane“, wón rozłožuje. Berndt je tež wšitkim, kotřiž po wukubłanju dźěło njedóstachu, poručił na agenturu přińć. Tam móža jim aktualnje 4 567 městnow we wuchodnej Sakskej posrědkować. Z 1 134 drje je naj­wjace poskitkow dale z wobłuka dźěła na čas, ale tež w dalšich branšach nowych sobudźěłaćerjow pytaja. Tak maja na přikład w předźěłacym přemysle tuchwilu 893 swobodnych městnow. 420 w strowotnistwje a socialni­stwje, 339 w twarstwje.

Wšo dohromady leži bjezdźěłnostna kwota w regionje njezměnjena pola 6,7 procentow. Wona chabła při tym mjez 3,7 procentami w Kamjenskej kónčinje a 11,3 procentami wokoło Zhorjelca, hdźež je wona z wulkim wotstawkom dwucyfrowa. Po wuprajenju Thomasa Berndta ma bjezdźěłnosć w Zhorjelskim wokrjesu strukturne přičiny. „Za wšěch tam bydlacych njeje dosć dźěła“, wón potwjerdźa. We wšitkich dalšich kónčinach je naprašowanje za dźěłowymi mocami dale „jara wulke“. To wujewja tež přirunanje wo­beju wokrjesow: W Budyskim wučinja kwota bjezdźěłnosće 5,5 procentow, w Zhorjelskim 8,3 procenty. Najebać lochki rozrost bjezdźěłnosće porno minjenemu měsacej bě w juliju w Hornjej Łužicy 1 551 ludźi mjenje bjez dźěła hač loni w samsnym času.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND