Bywši młyn zaso z procha stawa

pjatk, 07. septembera 2018
artikl hódnoćić
(0 )
Byrnjež hišće hotowy njebył, skići bywši młyn w Swinjarni hižo nětko zaso rjany  napohlad. Pětr Lebza chce tu ze swójbu zaćahnyć. Do toho pak móža sej zajimcy  njedźelu na dnju wotewrjeneho pomnika dom wobhladać.  Foto: Marian Wjeńka Byrnjež hišće hotowy njebył, skići bywši młyn w Swinjarni hižo nětko zaso rjany napohlad. Pětr Lebza chce tu ze swójbu zaćahnyć. Do toho pak móža sej zajimcy njedźelu na dnju wotewrjeneho pomnika dom wobhladać. Foto: Marian Wjeńka

Stajnje druhu njedźelu septembra přewjeduja po cyłej Němskej dźeń wote­wrjeneho pomnika. Do njeličomnych twarjenjow, kotrež hewak přistupne njejsu, móžeš tón dźeń pohladać. Tež stary dom w Swinjarni móžeš sej zajutřišim, 9. septembra, wobhladać.

Swinjarnja (SN/MWj). Na samej kromje Swinjarnje při pućiku do Lipja w susodnych Pančicach-Kukowje steji dom, kotryž tuchwilu takrjec z procha stawa, štož runjewon posłownje přitrjechi. Něhdźe wot spočatka 1960tych lět njeběchu na domje ničo činili, tak zo zawěrno žadyn rjany napohlad njeskićeše. Nětko pak tam nowe žiwjenje zaćehnje. Po tym zo je rodźeny Budyšan a nětko w Drježdźanach bydlacy Pětr Lebza statok zdźědźił, so wón rozsudźi jón ponowić, zo móhł tam ze swójbu bydlić.

Rjemjeslnicy tuž w historiskim tykowanym domje pilnje dźěłaja. Něhdy dźěłaše tule młyn, pozdźišo bě tež wojnarstwo zaměstnjene. Wuměnjejo wšelake drjewjane dźěle třěchi a wjerchow woni zwěsćichu, zo pochadźa wužiwane drjewo z lěta 1660. Dalša lětoličba, kotraž je na zornowcowym kamjenju zadypana, je 1680. Tak je Swinjarčanski dom druhi najstarši regiona. Najstarši steji w Hrańcy. Naspomnjeny zornowcowy kamjeń je Pětr Lebza najprjedy raz do pincy stajił. Tam wuhladaš zajimawostku, kak bywša młynska hrjebja přeco hišće pod domom ćeče. W přizemju su mjeztym wšitke sćěny znowa zaćehnjene, tež nowe wokna su zatwarjene. Přiwšěm zbywa hišće dale wjele dźěła.

W tej twarskej fazy móža sej zajimcy zajutřišim dom wobhladać. Ideju je mandźelska Pětra Lebzy hromadźe z Němskej pomnikoškitnej załožbu zrodźiła. Wopytowarjo njebudu so jenož po domje wodźić dać móc, ale móža tohorunja na hudźbne poskićenja na gitarje słuchać. A so wě, zo nichtó hłódny a lačny woteńć njetrjeba.

Po wšej Hornjej Łužicy budźe na dnju wotewrjeneho pomnika, kiž steji pod hesłom „Wotkrywać, štož nas zwjazuje“, wjele dalšich twarjenjow přistupnych. Štóž chcyše přeco hižo raz za kulisy Serbskeho ludoweho ansambla pokuknyć, změje tón dźeń wot 14 do 18 hodź. składnosć k tomu. Młodźi wopytowarjo móža sej na zjawnym treningu we wobłukomaj moderneho a klasiskeho rejwanja swět baleta zbližić. Za zajimcow techniki je wustajeńca zarjadowanskeje techniki spřihotowana. Nimo toho wopytowarjam zmóžnja zhotowjenje čertowki wobkedźbować. Nimo šwalčernje a baletneje žurle budźe tež byrgarska zahroda wotewrjena. Paralelnje je Röhrscheidtowa bašta wot 10 do 17 hodź. na dnju wotewrjeneho pomnika přistupna.

W Budyskim Serbskim muzeju budźe njedźelu zastup darmotny. W 11 a 15 hodź. wotměja wodźenje po wosebitej wu­stajeńcy „Dźěl wote mnje“ z wuměłču ­Reginu Herrmann. Dale je na žurli wustajeńca medaljow a pjenjez widźeć.

Składnostnje dźesaćlětneho wobstaća Budyskeho wokrjesa w jeho dźensnišej formje budźe krajnoradny zarjad na Dwórnišćowej přistupny. Tam móža sej zajimcy mjez druhim historisku trezo­rowu rumnosć a běrow krajneho rady wobhladać.

Dale wotewrjene budu zajutřišim nimo dalšich objektow Radworske dwórnišćo, Minakałski hród, zbytk bywšeje kaserny w Tuchorskim lěsu pola Hornjeho Wujězda, Hodźijska cyrkej Pětra a Pawoła, Smochčanski Dom biskopa Bena, Małowjelkowske sotrownje a Koporčanski hród.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND