Połdra tony rybow wućahnyli

póndźela, 08. oktobera 2018
artikl hódnoćić
(0 )
Z Moniku Cyžowej (srjedźa) stej Laura Dinkhellerec (nalěwo) a jeje sotra Sophie (naprawo) demonstrowałoj, kak bu něhdy butru dźěłana.  Foto: Alfons Handrik Z Moniku Cyžowej (srjedźa) stej Laura Dinkhellerec (nalěwo) a jeje sotra Sophie (naprawo) demonstrowałoj, kak bu něhdy butru dźěłana. Foto: Alfons Handrik

Sta wopytowarjow so za karpy, oldtimery, kisykał a smjetanu zajimowali

Bóšicy (aha/SN). Lětsa je tomu 20 lět, zo je Stanij Ryćer kupanski hat kupił, kotryž běštaj za čas NDR Bóščanska gmejna a Wětrowska šamotownja twariłoj. Wot toho časa wón tam ryby plahuje. Wčera je hibićiwy Jasčan šěsnaty raz na zjawne wułójenje rybow z hata přeprosył.

Hižo dopołdnja witachu tam sta ludźi, jako Bóščanscy dujerjo k zazběhej zahudźichu. Rybarjo na to syć wupołožichu a předstajichu zajimcam, kak z małym kranom stajnje 75 kilogramow rybow ze syće do bazenka pušća. Wopytowarjo móžachu so wo dobrym słodźe karpow na městnje přeswědčić. Za to běštaj Mike Mißbach a Jan Ryćer do toho něhdźe sto karpow zarězałoj. Najćeši wažeše šěsć ­kilogramow. Tež wšelake dźiwinowe ­jědźe, pražene kołbaski a steaki sy sej k wobjedu we wulkim stanje popřeć móhł.

Při přihotach na zarjadowanje Stanija Ryćerja Wětrowski oldtimerowy klub podpěruje. Jeho čłonojo wustajachu tam wčera swoje stare jězdźidła. Samo kluby ze zdalenišich kónčin mjeztym do Bóšic přijědu. Zajim zbudźili su nimo toho rjemjeslnicy ze swojimi wudźěłkami, kaž běchu to znowa Pólkecy z pčołarskimi poskitkami. Klaus Neumann z Njeswačidła točeše z njebozom dźěry do sylnych zdónkow, kajkež něhdy za klumpanje wody wužiwachu. Radlubje wón zajimcam tajku klumpu zhotowi. Problem pak je, zo trjebaš za to wšelake železne dźěle, kotrež mjeztym ćežko dóstanješ. Dźěćom, ale tež jich staršim bě zajimawe dožiwić, jako Manja Nürnberger z Kubšic swoje pazoraki, škraholcaj a někotre sowy, předstaji. Wabił je dale Lejnjanski dumperowy klub, jako jězdźerjo swoju wušiknosć na legendarnych jězdźidłach z NDRskeho časa pokazachu. Zo je kisykał strowy, wo tym su Rynčec swójbni runje tak kaž dny do toho doma w Jaseńcy tež wčera mnohich přeswědčili. Spěšnje su Florian a Jurij Rynč kaž tež jeju sotra Lejna Herbergowa 60 kilogramow kałowych hłójčkow předźěłali.

Dinkhellerec sotře Sophie a Laura stej w narodnej drasće ze sto lět starej centrifugu z mloka smjetanu wjerćałoj a zhromadnje z Moniku Cyžowej z butrobasom butru dźěłałoj. Radźićel Bóščanskeje gmejny Bjarnat Cyž, kotrehož sy hewak mjez rybakami wuhladał, přewodźeše wčera wosom čěskich hosći z partnerskeje gmejny Srbsko blisko Prahi. Woni běchu wo tak přiwabliwym zarjadowanju, hdźež móžachu bohaty popad połdra tony karpow, linow a někotrych šćukow dožiwić, zahorjeni. Runje tak wjeseleše so wulka syła dźěći, na kotrež njeběchu zabyli. Wone móžachu na ponyjach jěchać abo na připowěšaku stareho traktora sobu jěć.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND