W Krabatowym młynje wuhotuja kwasnu hosćinu

štwórtk, 18. oktobera 2018
artikl hódnoćić
(0 )

Čorny Chołmc (SN). Po lětušich Krabatowych swjedźenskich hrach dožiwi Čornochołmčanski Krabatowy młyn sobotu, 27. oktobra, dalši wulki wjeršk. Tam chcedźa tradicionalny serbski kwas předstajić. Wot Załožby za serbski lud podpěrane zarjadowanje organizujetej wjesna drastowa skupina a Krabatowy młyn.

Kaž jeho jednaćel Tobias Čižik informuje, započnje so popołdnjo w 14.30 hodź. ze zaćahom kwasneho ćaha. Jón přewodźuje Rakečanska dujerska kapała. Wopytowarjam chcedźa zajimawostki a nadrobnosće serbskeho kwasa rozłožić a mjez druhim znazornić, čehodla njewjesta po połnocy hinašu drastu nosy hač do toho. Wjeselić smědźa so hosćo na słódnu kwasnu hosćinu. Jim poskića kofej a burski tykanc, kwasnu poliwku, hejdušne krupy kaž tež chrěn a howjaze mjaso. Po jědźi předstaji Čornochołmčanski kwasny ćah tradicionalne kwas­ne reje, potajkim walčik, „Hanamarju“ a pólku. W běhu wječora zahudźi dujerska kapała tež za wšitkich dalšich kwasnych hosći k rejam. Z tymle zarjadowanjom chcedźa k zachowanju serbskich nałožkow přinošować. Tohodla bychu so wjeselili, by-li prawje wjele wopytowarjow w narodnej drasće přišło. Wumě­njenje za wopyt pak to njeje, podšmórnje Tobias Čižik. Zastup płaći na wosobu 50 eurow inkluziwnje jědźe, ale bjez napojow. Zajimcy njech přizjewja so pod telefonowym čisłom 035722/ 951 133 abo e-mailnje pod

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND