Rakečanska bydlenjotwarska towaršnosć w hospodarskich wuskosćach
Rakecy (JK/SN). Zawěsće bychu sej Rakečanscy gmejnscy radźićeljo něšto rjeńšeho k hodam přeli hač powěsć wo wjac hač napjatej situaciji tamnišeje bydlenjotwarskeje towaršnosće. Hižo někotre lěta maja wobstajnje rosćacu ličbu prózdnych bydlenjow. Te pak dyrbja přiwšěm dale wobhospodarjeć, štož zawinuje na jednej stronje běžne wudawki, na tamnej pak njezawěsća dosć dochodow. Nimo toho mějachu lětsa prózdnych bydlenjow dla wulku sumu njeplanowanych wotpisanjow (Abschreibungen). Pod smužku to rěka, zo ma towaršnosć, kotrejež hłowny mějićel je gmejna Rakecy, ćeže kredity posłužować. Dochody njedosahaja, zo bychu dosć likwidnych srědkow měli, byrnjež jim pruwowar lěpši cashflow hač w lěće 2016 wobkrućił. To pak towaršnosći wjele njepomha. Zo njeby do dalšich wuskosćow přišła, jedna komuna z banku, a ta je po słowach wjesnjanosty Swena Nowotneho (CDU) signalizowała, ze saněrowanskim konceptom Rakečanam napřećo přińć.
