Budyšin (SN/JaW). Němska wuchowanska lětanska słužba (DRF Luftrettung) přewozmje w Budyšinje po nowym lěće staciju wuchowanskeje lětanskeje słužby. Wo tym informuje nowinska rěčnica DRF Sabine Bruder w nowinskej zdźělence. Němska DRF, kotraž ma swoje sydło w badensko-württembergskim Filderstadće, je za to trěbny helikopter do Budyšina pósłała.
„Wot 31. decembra hižo čerwjeno-běły moderny helikopter typa H 145 z mjenom Christoph 62 w sprjewinym měsće a wokolinje zasadźimy“, Sabine Bruder připowědźa. Zaručić maja lětacy fachowcy z Budyšina tak wšědnje a w kóždym času transport pacientow mjez klinikami kaž tež wo spěšnu pomoc při njezbožach. „Wosebitosć je specialne wuhotowanje z wuchowanskej wijawu, kotruž trjebamy za zasadźenja předewšěm w ćežko přistupnych kónčinach we wuchodnej Sakskej. Při tym dźěłamy derje z našim partnerom Hórska straža Sakska hromadźe“, Sabine Bruder wujasnja. Nimo toho wobsedźi H 145 dowolnosć, zasadźeć nócne dalokowidy (Nachtsichtgeräte). Dale ma pilotam po nocach wysokowukonity swětłomjetak pomhać.