Kokoše zaso měrnišo žiwe

póndźela, 07. januara 2019
artikl hódnoćić
(0 )
Z pjeć kruchami zatřěleneje dźiwiny bě wuslědk sobotneje hońtwy w Delanach skerje snadny.  Foto: Tomaš Šołta Z pjeć kruchami zatřěleneje dźiwiny bě wuslědk sobotneje hońtwy w Delanach skerje snadny. Foto: Tomaš Šołta

Nowolětnu hońtwu w třiróžku Smjerdźaca-Pěskecy-Róžant přewjedli

Smjerdźaca (jh/SN). Hońtwjerskej dru­stwje Pěskecy a Róžant stej sobotu z wotnajerjemi tamnišich lěsow, polow a łukow Michałom Šołtu z Drježdźan (hońtwjerske drustwo Róžant) kaž tež Salowčanom Pětrom Kralom a Janom Šołtu z Drježdźan (wobaj hońtwjerske drustwo Pěskecy), swoju tradicionalnu hońtwu přewjedłoj. Na njej wobdźěli so lětsa něhdźe 70 honjerjow a 35 hajnikow.

Dopołdnja zetkachu so wšitcy při Starym haće pola Smjerdźaceje. Tam zapokazachu wobdźělnikow za hońtwu a dachu jim wěstotne pokiwy, zo njeby k žanym njezbožam dóšło. Mjeztym zo po­dachu so honjerjo w dwěmaj wulkimaj skupinomaj do Róžanta a Pěskec, rozrjadowachu so hajnicy na připokazane rěble, klětki a dalše městna. Dypkownje štwórć na jědnaće tłóčeštaj rjećazaj honjerjow ze směra Pěskecy a Róžanta do směra na Stary hat pola Smjerdźaceje, zo byštej dźiwinu z lěsa honiłoj. Wobdźělnikam pak so w běhu połdrahodźinskeje hońtwy wjele lěsneje zwěriny njepokaza, tež hońtwjerske psy tójšto kilometrow po­darmo dźěłachu. Tak ličachu wšitcy hižo ze srěnim wunoškom. Dźakowano pjeć mišterskim wutřělam štyrjoch hońtwjerjow pak ležachu při wuhódnoćenju a zakónčenju hońtwy pjeć kruchow zatřěleneje dźiwiny mjez hałuzami jehlinowcow. Mjez štyrjomi sornami bě tež młoda liška, kotraž bě w zašłych tydźenjach w Róžeńće pola třoch swójbow hnydom pjeć kokošow zakusała a wotnjesła. Hišće na městnje bu wona hłuboko zahrjebana. Powěsć wo zatřělenej lišce so po Róžeńće spěšnje roznjese, zo njebychu so wobsedźerjo a drobna pjerizna hižo dlěje strachować dyrbjeli.

Z kralom třělcow sta so na nowolětnej hońtwje Ralbičan René Wjacławk. Jemu so z dwěmaj wutřělomaj poradźi dwě sornje zatřělić. Při wuhódnoćenju hońtwy pak jewješe so w nimale kóždej rozmołwje problem mało zwěriny w lěsach hońtwjerskeju drustwow Róžant a Pěskecy. Wjeselo nad lišku a štyrjomi zatřělenemi sornami tuž přewulke njebě.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND