Rozestajenja z wopłóčkowym zwjazkom radźićelow hižo dlěje zaběraja

Róžant (JK/SN). Hižo dlěši čas prócujetaj so Křesćan Gruhn a Józef Woko jako zastupjerjej gmejny Ralbicy-Róžant w za­měrowym zwjazku za wopłóčki Při Klóšterskej wodźe (AZV), dóstać informacije a wujasnjenja k zestawje a kalkulaciji wopłóčkowych popłatkow. Wosebje njejasne a po měnjenju Gruhna a Woka njesprawne postajenja při zakładnym popłatku wjedu k dźeń a wjace skóržbam a problemam pola přizamknjenych domjacnosćow.

Křesćan Gruhn sam je nastajił přehlad hospodarskeje bilancy AZV, kotruž je gmejnskim radźićelam na jich zašłym posedźenju předstajił. Při tym wón na to skedźbni, zo je w zaměrowym zwjazku w bilancy minjeneho hospodarskeho lěta dobytk wupokazany. Tón by po słowach Gruhna zakład za to był, gmejnam něhdy zaměrowemu zwjazkej přewostajene pjenjezy w formje danje zaso wróćić. Nimo toho měli nadźěłane financy wuchadźišćo być, popłatk znowa wobličić a zdobom pomjeńšić. To pak jednaćelstwo zaměroweho zwjazka nječini a tež na na­prašowanja njereaguje, rjekny Gruhn.