Kamjenski Muzej zapadneje Łužicy móžeše loni něhdźe 30 000 wopytowarjow witać. Wosebje swójby su poskitki wustajeńcow a zarjadowanjow rady wužiwali, samo z Drježdźan.
Kamjenc (SN/mwe). „Akciski dźeń za cyłu swójbu“ – tute zarjadowanje je w elementariju Muzeja zapadneje Łužicy wosebje woblubowane. Kaž Bodo Plesky z nowinskeho běrowa praji, wosebite wustajeńcy wopytowarjow najbóle wabja. Tak tež aktualna přehladka wo amfibijach, kotraž je tam hač do 31. měrca přistupna. Kelko ludźi do muzeja přichadźa, zaleži zwjetša na wjedrje. „Na wustajeńcach njemóže zaležeć, zo njeje loni w lěću při njezwučenej horcoće telko ludźi kaž 2017 do našeho muzeja přišło“, Plesky twjerdźi.