Zaso najwšelakoriše zynki słyšeć

wutora, 14. meje 2019
artikl hódnoćić
(0 )

Tři dny so Budyšin tež lětsa na pisane město změni, tónkróć pak njepřewjedu 1017. Budyske nalěćo wólbow dla posledni kónc tydźenja w meji, ale tydźeń pozdźišo wot 31. meje do 2. junija.

Budyšin (SN/BŠe). Organizatorojo wokoło kulturneho šefa města Andreasa Henniga lubja znowa pisany program, kotryž na wšelakich jewišćach městach pokazuja. Wot minjeneho lěta wšak zarjaduja jewišćo tež w saněrowanej rozwalinje mnišeje cyrkwje na Wulkej Bratrowskej. Organizatoriski kłobuk na hłowje ma tam Budyski Lions Club. Bjezposrědnje napřećo zaměstnjeny hosćenc „Culinarium“ je sobu zapřijaty a chce hosći z kulinariskimi wosebitostkami zapleńčić.

Dalše zarjadowanišćo je předwidźane na Hłownym torhošću, hdźež ma skupina Jolly Jumper furiozny start do swjedźenskeho kónc tydźenja wobradźić. Samsny dźeń zaklinča na Mjasowych wikach zynki DJjoweho teama Lectrixx kaž tež skupin Alexander Schmidt, Falmar a Marty Hall. Na Butrowych wikach zahaja projekt elektroniskeje hudźby. Tež na Žitnych wikach planuja pjatk tójšto hudźbnych poskitkow. Dźeń pozdźišo zarjaduja tam zaso Serbsku piwowu zahrodu, hdźež chcedźa wopytowarjam mjez druhim serbsku kwasnu jědź a butřankowe plincy poskićeć, a k rańšemu piwku zaklinča zynki Chróšćanskich muzikantow. Popołdnju přewozmje tam Danko Handrik moderaciju. Serbska rejwanska skupina Smjerdźaca pokaza premjeru swojeho noweho folklorneho programa „Moja reja“. Skupina Sprjewjan a dalši hudźbnicy budu inscenaciju přewodźeć.

Kaž hižo z tradiciju je sobota dźeń towarstwow, kotrež swoje dźěło na stejnišćach předstajeja. Woni změja tójšto překwapjenkow za dźěći spřihotowanych, wšako je 1. junij zdobom dźeń dźěsća. Tež njedźela budźe połna zajimawych wjerškow. „Zapřijimamy stajnje hudźbnikow z regiona“, Andreas Hennig praji. Tak přijědu mjez druhim Zaspowscy Dixieland Stompers z Choćebuza a znata spěwarka Katrin do Budyšina. Zdobom skedźbnja wón na to, zo wustupi njedźelu popołdnju na Hłownym torhošću dobyćerka lońšeje casting-show DSDS Marie Wegener.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND