Dwurěčnosć hosćom napadnyła

póndźela, 03. junija 2019
artikl hódnoćić
(0 )
Z hudźbu a křudami postarachu so hosćo ze Chiemgauwa minjeny pjatk na wjacorych Horjanskich statokach wo dobru naladu.  Foto: Ulrike Herzger Z hudźbu a křudami postarachu so hosćo ze Chiemgauwa minjeny pjatk na wjacorych Horjanskich statokach wo dobru naladu. Foto: Ulrike Herzger

Hory (UH/SN). Při najrjeńšim słónčnym wjedrje a z wulkim wjeselom wšitkich wobdźělenych skónči so wčera 13. cyłoněmske zetkanje městow a wsow z mjenom Hory na Horach w gmejnje Halštrowska Hola. Po wšej Němskej je wosom městow a gmejnow kaž tež dalšich 17 wjesnych dźělow z tymle mjenom. Za tajki fenomen dyrbiš so bliže zajimować, myslachu sej iniciatorojo a organizowachu 1995 prěnje tajke zetkanje, kotrež so stajnje na podlěšenym kóncu tydźenja po Božim spěću w dwulětnym rytmusu wotměwa. „Kóžde zetkanje dopokazuje, zo bě tale ideja złoto hódna“, wuzběhny wjesnjanosta Halštrowskeje Hole Dietmar Koark (CDU), kiž sam na Horach bydli, minjeny štwórtk na witanju.

Zašłe dny so wjes ze swojimi 700 wobydlerjemi runjewon pukaše, telko wopytowarjow bě z Wojerec a wokoliny přijěło. Wobydlerjo witachu jich z přijomnje wupyšenymi ležownosćemi a přede­wšěm pjatk ze 16 wotewrjenymi statokami. Tam poskićachu typiske łužiske jědźe kaž tež live-hudźbu. Runočasnje starachu so „Horjenjo“ z Rujan, Chiemgauwa, Posaarskeje, Delnjeje Sakskeje a wot dru­hdźe ze swojej hudźbu a narodnej drastu wo přewšo dobru naladu. Mjez druhim je hosćom dwurěčnosć wokoło Wojerec napadnyła. To sej mjez druhim wopytowarjo z Rujan chwalachu a zdobom wobžarowachu, zo so jich starodawna delnjoněmčina dźeń a dale pozhubja.

Sobota steješe cyle w znamjenju pisanych wikow, hdźež so hóstne delegacije ze swojimi regionalnymi specialitami předstajichu. Wječor móžachu wšitcy zhromadnje mejemjetanje dožiwić, a na to su w swjedźenskim stanje hač do rańšich hodźin lóštnje swjećili.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND