Wobchod na prěnim poschodźe był

štwórtk, 08. awgusta 2019
artikl hódnoćić
(0 )
Wot lěta 1969 móžachu wobydlerjo Stróže w tymle twarjenju nakupować. Dźensa je to skład molerskeje firmy. Foto: Alfons Handrik Wot lěta 1969 móžachu wobydlerjo Stróže w tymle twarjenju nakupować. Dźensa je to skład molerskeje firmy. Foto: Alfons Handrik

Něhdy bě w nimale kóždej wsy naku­powanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjes­njenjo rady k bjesadźe zetkawachu. W našej lětnjej seriji na něhdyše wjesne wob­chody dopominamy.

Dźensa: Stróža (12)


W Stróži (Wartha), małej wsy Malešanskeje gmejny, měješe na Bernardec sta­toku za čas Druheje swětoweje wójny a hišće po tym wěsty Petrik wobchodźik. Serbja, a tych bě tehdy we wsy samej a w bliskim Lemišowje (Lömischau) hišće wjele, pola njeho serbsce nakupowachu. Jeho dźowka Hanaróža, pozdźiša mandźelska dr. Pawoła Völkela, bě prěnja serbska holca, kotraž je we wukraju studowała, a to hudźbu na Karlowej uniwersiće w Praze. Tež pozdźišo jako wučerka na Budyskej ludowej uniwersiće je wona stajnje jako wědoma Serbowka wustu­powała. W Bernardec domje je dźensa woblubowany hosćenc, pomjenowany po rybačku (Eisvogel), ptačku lěta 1973 a 2009.

Předawać na prěnim poschodźe njebě jeno za kupcow wobćežne, ale tež za předawarja, wšako dyrbješe stajnje wšón poskitk­ horje nosyć. Rozrisanje, byrnjež nic runjewon optimalne, bě, zo přepołožichu předawarnju do wjesneho hosćenca wosrjedź wsy. Nimo tam zarjadowa­neje předawarnje bě w tym domje na­lěwo kowarnja; naprawo korčmar piwo točeše a po dźěle lačnych posłužowaše. Po tym je konsum předawarnju přewzał.

1898 natwarichu w Stróži nowu šulu, a to na městnje dotalneje, hdźež bě hač do 1852 Korla Awgust Kocor šulerjow wu­čił. Sto lět pozdźišo, 1951, so šulske stawizny Stróže kónča. Konsumowu předawarnju přepołožichu do zawrjeneje šule. Ludźom bě to z wjacorych přičin wolóženje. Předawarnja we wulkej rjadowni delnjeho poschoda skićeše móžnosć, zo běchu wšě poskitki přehladnje na polcach zaměstnjene. Sieghard Kozel, kiž je hač do 6. lětnika w Stróži wuknył, so hišće derje dopomina, kak je so Annelies Kunatowa swój čas stajnje wo čerstwe twory starała.

W 1960tych lětach na wjacorych wsach blišeje wokoliny nowe předa­­warnje nastawachu. Tež Stróženjo sej tajku přejachu. Njebojachu so wužadanja a w do­browólnym dźěle so gratu přimachu, zo bychu składnostnje 20. róčnicy załoženja Němskeje demokratiskeje republiki w lěće 1969 nowu, modernu konsumowu předawarnju měli. Twarnišćo bě na gmejnskej ležownosći njeposrědnje při bywšej šuli. Twarski nawod přewza nazhonity serbski muler Helmut Funka ze Stróže. Twar a jeho wuhotowanje ze šěrokim wukładnym woknom bě wulke wudobyće za Stróžu. W tym času mějachu we wsy hišće aktiwnu Domowinsku skupinu, kotrejež předsyda bě Herman Chěžnik. Annelies Kunatowa, wona nětko tež w nowej předawarni kupcow posłužowaše, je samo na Domowinskim zarjadowanju wo dobrych móžnosćach zastaranja přednošowała.

Njeposrědnje po politiskim přewróće tež w Stróži konsumowu předawarnju zawrěchu. Wot lěta 1997 je knjeni Radekowa wobchod za zastaranje priwatnje dale wjedła. Tola po dźesać lětach w Malešanskej gmejnskej nowinje zdźělichu, zo bu wužiwanje předawarnje w gmejnskim objekće w Stróži k 31. oktobrej 2007 wupowědźene. Dźensa ma tam molerska firma Zoch swój skład. Sieghard Kozel je swój nazběrany stawizniski material a informacije wo wsy kaž tež swójske dožiwjenja spisał do knihi, kotraž ma hišće lětsa wuńć. Alfons Handrik

wozjewjene w: Lokalka

Galerija

dalši wobraz (1)
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND