Hižo na konstituowacym posedźenju horco diskutowali
Trjebin (CK/SN). Małe cokorowe tity a knihi za čestnohamtske dźěło dóstachu čłonojo Trjebinskeje gmejnskeje rady na swojim prěnim posedźenju, po tym zo bě jich wjesnjanosta Waldemar Locke (CDU) spřisahał. Ale hižo prěni personalny rozsud postara so wo diskusiju. Dwě wosobje powoła Trjebin do zarjadniskeho wuběrka, w kotrymž stej tež gmejnje Slepo a Dźěwin zastupjenej. Štyrjo radźićeljo běchu k tomu zwólniwi. Ariane Kraink (wolerske zjednoćenstwo My za Trjebin) kaž tež frakcija CDU chcyštej rozsud wo tym přestorčić, njedocpěštej pak za to wjetšinu. Wuslědk tajnych wólbow bě njerozsudny. Los rozsudźi skónčnje za Uwe Radtkeho (wolerske zjednoćenstwo My za transparencu w Trjebinje) a za Detlefa Rölku (CDU).