Budyšin (SN/MWj). Z třidnjowskim staroměšćanskim festiwalom dožiwi Bu­dyšin wot jutřišeho hač do njedźele wulki spektakl, kotryž zawěsće zaso wjele ludźi­ přiwabi. Hromadźe z něhdźe 500 akterami je Budyske turistiske towarstwo program zestajiło, wopřijacy něhdźe sto wšelakich dypkow wot reje a hudźby přez dźiwadło hač k srjedźowěkowskim pokazkam.

Tež na někotre serbske poskitki smědźa so wopytowarjo wje­selić. Jutře, pjatk, na přikład přeprosy skupina Serbska reja w 17 hodź. na lóštne rejwanje a bjesadu. Rejwać chcedźa před Serbskim muzejom kaž tež na jeho žurli. Dalši program staroměšćanskeho festiwala skići Serbski muzej z čěskej skupinu Aliquis sobotu, 31. awgusta. Koncert z hudźbu srjedźowěka, renesansy a baroka zahaji so w 17 hodź. Tak zaklinča lubosćinske spěwy a lóštne rejwanske štučki wšelakich krajow. Zběrka historiskich instrumentow wuprudźa zynki toho časa. Kaž wšitke programowe dypki festiwala je tež tónle bjez zastupa.