Tradicionalne Ralbičanske babylěćo znowa wulki wuspěch było

Ralbicy (JK/SN). Rjane babylěćne wjedro zaruči idealne wonkowne wuměnjenja za woblubowany Ralbičanski wjesny a wobydlerski swjedźeń na kóncu lěća. Wjesna rada bě z podpěru mnohich pomocnikow zaso swjedźeń organizowała, kotryž cyłe tři dny zabawu, spěw a wjeselo kaž tež za wšitke generacije něšto poskićeše.

Hižo pjatk wječor wubědźowachu so wohnjowe wobory a přihladowarjam k tomu čerstwje natočene piwko zesłodźa. Sobotu wječor pak zetkachu so zaso wjesnjenjo na swój program, hdźež so sami mjez sobu zabawjachu, raz pošwikachu a mjez druhim spóznachu, kelko kmanych dobrych wuměłcow a talentow w swójskich wjesnych rjadach maja.