Mnohostronski swjatk za wšitke zmysły

štwórtk, 10. oktobera 2019
artikl hódnoćić
(0 )
Na Ćišćanskej nawsy móžachu so hosćo samo na spławje po wjesnym haće ćahnyć dać – wězo na swójsku zamołwitosć. Na Ćišćanskej nawsy móžachu so hosćo samo na spławje po wjesnym haće ćahnyć dać – wězo na swójsku zamołwitosć.

Wjesne dźěle města Wojerec Ćisk, Brětnja­ a Čorny Chołmc wuhotuja kóžde­ lěto­ we wotměnje dworowy swjedźeń. Njedawno wotměchu jón w Ćisku, a to z wuspěchom.

Je sobota, dopołdnja na Schu­bertec statoku: Rjane wjedro je dar njebjes. „Prěnje jelenje na městnje“ (Platz­hirsche) steja dobreje nalady za tejku, zo bychu kulinariske přeća hosći spjelnjeli. „Sornjo“ swojej maćeri hordźe pokazuje, kajku wuměłsku twórbu je same­ spasliło, mjeztym zo „rewěrowy nawoda“ při wutykanymaj šwincu a kunje wšitko dokładnje wobkedźbuje.

Schubertecy, jich partnerojo a pomocnicy njejsu sej za lětuši Ćišćanski dwo­rowy swjedźeń jenož nastupajo wotpowědnu drastu – w tym padźe poćišćane T-shirty – a z wuhotowanjom dwora něšto­ wosebite wumys­lili. Lětuša tema rěka: hońtwa. Wšako ma swójba w swojim přećelskim kruhu tež aktiwnych hajnikow, kotřiž běchu hnydom zwól­niwi jich podpěrać. „Tema bě nam tuž bliska, a chcemy dźě hosćom na dworowym swjedźenju tež stajnje něšto nowe skićić“, měni Tina Schubert.

Předsudki přewinyć

Michael a Monique Amelung staj Schubertec swójbje přihódnu dekoraciju za wuhotowanje přewostajiłoj. André Kittner dawaše hosćom na wodźenjach po sta­toku dohlady do swojich nadawkow jako hońtwjer, při čimž spyta tež rozswětleć a předsudki wottwarjeć: „Mnozy zhladuja na hońtwu z wulkimi předsudkami, cyle pod motom, zo dźiwinu jenož wotpraskamy. To pak njeje cyle prawje. Ze swojim dźěłom zdobom aktiwnje přirodu škitamy a dźeržimy wobstatk zwěriny stabilny a strowy“, 41lětny rozłoži.

Tuchwilu je rozmnoženje šupa (Wasch­bär) problem, dokelž načinja wulku škodu, hdyž hnězda na přikład spěwatych ptakow wurubja a tak jich wobstatk wohroža. Pokiw šoferam je Kittner gratis k tomu dał. Štóž je so mjenujcy hižo prašał, čehodla je kuna runje na jeho awće zachadźała, dósta wot njeho slědowacu wotmołwu: Kuny su w swójskich rewěrach žiwe. Přestupi-li jedna z nich hranicy, kusa „domjaca“ kuna z hněwa a móžneho hrožaceho wuhnaća dla do gumijoweho powoda (Leitung) jězdźidłow.

Wjac hač tysac porcijow

Na wustajenych rohiznach (Geweihe) a wutykanych mjeńšich zwěrjatach zhonichu zajimowani hosćo tež wjace wo žiwjenskim wašnju liškow, sornow a dźiwich swini. Štóž chcyše nimo toho wědźeć, kak dźiwina słodźi, pak měješe sej ćežko so za prawu jědź rozsudźić. Wot dźiwinoweho gulaša přez knakery, bokowki a pražene kołbaski njewosta ni­­male žane přeće njespjelnjene. Wjac hač tysac­ porcijow je na dworowym swje­dźenju na Schubertec statoku přez tejku „pućowało“. Hižo to wuwědomja wopytowarjam dimensije a wuspěch koncepta dworoweho swjedźenja w Ćisku.

Swjedźeń pisany kaž žiwjenje

Rozpalitosć za tradiciju a lubosć k de­tai­lam bě runje tak na tamnych wob­dźě­le­nych statokach pytnyć. Započejo z běrna­mi hač k serbskim specialitam a nałožkam runje tak kaž prezentacijam historiskeje techniki z ratarstwa a domjacnosće w změnje časa wukopa so Ćišćanski dwo­rowy swjedźeń jako jara mnohostronski a pisany kaž žiwjenje same.

Nimo pokazkow na dawne časy njesmě­dźeše wězo tež (přewšo wažny) pohlad do při­tomnosće pobrachować. Dypk to, wo kotryž so w Ćisku přichodnje starosćić njetrjebaja, hladajo na an­gažowanosć tamnišeho serbskeho dźěćaceho towarstwa, kotrež je so na dworowym swjedźenju zhromadnje z Ćišćanskej pěstowarnju „Dom lutkow“ před­stajiło, stupajo tak wuspěšnje do stopow staršeje generacije.

Sami bóle hromadu rostu

A po dworowym swjedźenju je Tinje Schubert znowa jasne, zo zarjadowanja kaž tele jenož wjesne žiwjenje a serbske tradicije njewozrodźeja. Swójby, přećeljo a partnerojo kaž tež Ćišćenjo sami zaso bóle hromadu rostu.

„Je prosće wšitko wulkotnje fungowało a naši pomocnicy su nas wuběrnje podpěrali. To wšěch wobdźělenych hišće bóle hromadźe skowa a je nam wšitkim wulke wjeselo wobradźało. Namaka-li so za tři lěta znowa dosć statokow za wuhotowanje dworoweho swjedźenja, budźemy tež my zaso pódla“, je Tina Schubert cyle zahorjena. Silke Richter

wozjewjene w: Lokalka

Galerija

dalši wobraz (1) Wjele zajimaweho wo hońtwjerstwje a dźiwinje wědźeše André Kittner zajimcam na Schubertec statoku powědać. Silke Richter
dalši wobraz (2) Ze serbskimi, němskimi a štučkami ze słowjanskeho wukraja je so dujerska kapała Horjany na Ćišćanskim dworowym swjedźenju wo wulkotnu naladu starała.
dalši wobraz (3) Za lubowarjow historiskeje techniki mějachu w Ćisku tójšto spřihotowane.
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND