Rakecy (aha/SN). Lipa, kotruž staj wčera dopołdnja Rakečanski wjesnjanosta Swen Nowotny (CDU) a čłon předsydstwa Domowinskeje skupiny Komorow-Trupin-Rakecy Günter Holder na dworje Rakečanskeho bywšeho knježeho kubła sadźiłoj, drje dopomina přichodnje na małe, ale rjane serbske zarjadowanje. Nowotny je wobdźělnikow wčera tež serbsce postrowił. Holcam a hólcam Witaj-skupiny Rakečanskeje pěstowarnje kaž tež jich kubłarkam rozłoži wón wu­znam tohole štoma za Serbow a na čo ma lipa wobydlerjow dopominać.