Dźěwin (AK/SN). Nowy napohlad Dźěwinskeje nawsy a rozšěrjene wuhotowanje Brězowskeje pěstowarnje stej wažnej předewzaći Dźěwinskeje gmejny za přichodne lěto. Na to orientowaše komornica Carmen Petrick na zašłym posedźenju gmejnskich radźićelow, jako rozjima klětuši hospodarski plan komuny. „Pjenježne móžnosće gmejny klětu runjewon róžojte­ njebudu. Ličimy z mjenje klučowymi připokazanjemi hač 2019. Hač so dochody z přemysłoweho dawka pozitiwnje wuskutkuja, njehodźi so nětko hišće rjec.“ Přichodny tydźeń chcedźa radźićeljo internje wo hospodarskim planje 2020 jednać. Próstwu wo spěchowanske srědki za wuhotowanje Dźěwinskeje nawsy chcedźa hišće raz zapodać, ručež budźe to we wobłuku programa za witalne wjesne srjedźišća zaso móžno. Za dalše wuhotowanje pěstowarnje je porno tomu 3 000 eurow zaplanowanych.