Budyšin (CS/SN). Budyska šulska hwězdarnja na kromje města w bliskosći přirodoweho parka ma nuznje ponowjenje trěbne. To přitrjechi za twarjenja runje tak kaž za personal, dokelž woboje hižo najmłódše njejsu. Zo bychu tuž hwězdarnju bóle do zjawneho srjedźišća Budyšanow wjedli, běchu měšćanska zawodowa a wobdźělenska towaršnosć (BBB) hromadźe z technologiskim spěchowanskim towarstwom a spěchowanskim towarstwom hwězdarnje na wosebity akciski dźeń přeprosyli. Minjenu sobotu dopołdnja móžachu šulerjo, kotřiž běchu so do toho přizjewili, na stejnišćach Zuseuma, Lubijskeho gymnazija a Zhorjelsko-Žitawskeje wysokeje šule zajimawe eksperimenty přewjesć. Popoł­dnju běchu potom swójby přeprošene, so na terenje hwězdarnje rozhladować, přez teleskopy na słónco, Wenus, Saturn a Arktur hladać a paslić.