Gmejna Łaz inwestuje sylnje do wopłóčkoweje syće, pěstowarnjow a do wjac bliskosće k wobydlerjam.
Łaz (AK/SN). Přizamknyć Koblicy (Koblenz) a Wulke Ždźary (Groß Särchen) wopłóčkowej syći wostanje za gmejnu Łaz (Lohsa) dale najwažniše ćežišćo w hospodarskim planje. „Wot lěta 2017 na tym dźěłamy. 5,6 milionow eurow naprawa cyłkownje płaći. Jeničce lětsa nałožimy za to w Koblicach a Wulkich Ždźarach 3,622 milionow eurow“, podšmórny komornica Mandy Liepert na njedawnym wuradźowanju Łazowskeje gmejnskeje rady. Parlament schwali na to z jednym napřećiwnym hłosom a jednym hłosawzdaćom etat za lěto 2019.
Financne połoženje komuny je přeco hišće chětro napjate. „Mamy zasadu zlutniwosće a hospodarskosće dodźeržeć. Mamy tuž telko kelkož móžno dochodow nadźěłać“, komornica wujasni a hišće raz jasnje wuswětli, „dołhodobne pjenježne nalutowanki 1,219 milionow eurow hišće mamy. Jeli pak nam kredit njepřizwola, budźe cyłkowny staw likwidnych srědkow kónc 2019 po zdaću jenož hišće 90 000 eurow wučinjeć.“ Facit tuž rěka: Wot klětušeho njebudu žane inwesticije wjac móžne.