Njebjelčanska gmejnska rada energijowemu konceptej přihłosowała

Njebjelčicy (SN/mwe). Gmejna Njebjelčicy planuje přichodnje w komunje dalše připrawy za produkciju miliny instalować a je zhromadnej syći přizamknyć. Energijowemu konceptej su gmejnscy radźićeljo na swojim wčerawšim posedźenju přihłosowali. Wjesnjanosta Tomaš Čornak (CDU) je społnomócnjeny, předle­žacy koncept z firmu Energie­Autark a z dru­stwom Łužiska přirodna energija podpisać.

Njebjelčicy planuja swój twarski zawod ze solarnej připrawu wuhotować kaž tež jednu abo wjacore mjeńše wětrnikowe připrawy instalować, zo móhli energiju dobywać. Při produkciji swójskeje miliny za gmejnsku pě­sto­warnju maja přewšo dobre nazhonjenja a chcedźa na zakładźe tutych dopóznaćow z ener­gijowym konceptom pokročować.