Jenož hišće drobne dźěła

štwórtk, 21. nowembera 2019
artikl hódnoćić
(0 )

Twar noweho němsko-serbskeho šulskeho kompleksa w Slepom derje postupuje.

Slepo (AK/SN). Twar noweho Slepjanskeho němsko-serbskeho šulskeho kompleksa so nachila. To wuchadźa z rozprawy nawody zarjada za planowanje, twarstwo a hórnistwo w zarjadniskim zwjazku Slepo Steffena Seidlicha, kotruž je gmejnskim radźićelam na zašłym posedźenju přednjesł. Tuchwilu zmištruja molerjo a kładźerjo špundowanjow hišće zbytne dźěła. Durje kaž tež zamkowa připrawa su zatwarjene. Tak zwostanu jenož hišće někotre drobne dźěła blidarjow.

Šula a hort stej nutřka hižo wuhotowanej. „Garderoby, rumnosće za ručne dźěło a kuchnje su hotowe“, rozłoži komornica Carmen Petrick. Wuhotowanje za fachowe kabinety hišće tón měsac dóstanu. Tež we wobłuku tepjenje, přewě­trjenje a sanitarne připrawy dźěłaćerjo poslednje dźěła přewjeduja. Kónc nowembra, komornica připowědźi, budźe objekt wotewzaty. Tež wo aktualnym stawje dźěłow na wonkownym arealu noweho kubłanišća radźićeljo zhonichu.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND