Wojerecy (SN). Spalowski móst budźe hišće do hód za motorizowany wobchad zawrjeny. Na to stej so měsće Wojerecy a Kulow, na kotrejuž komunalnej mjezy móst leži, dojednałoj. Tež Ćišćanska wjesna rada postupowanje w naležnosći podpěruje. Město Wojerecy informuje wo tym w medijowej zdźělence.

Jako přičinu mjenujetej komunje špatny twarski staw mosta, kotryž Spale z Ćiskom hižo dlěje hač poł lětstotka zwjazuje. „Aktualny wuslědk pruwowanja mosta je Wojerecy a Kulow pohnuł, wo dalšich kročelach k jeho zachowanju rozmyslować. Pruwowanje wunjese mo­stej znamku 3,5 nastupajo twarski staw. Wěstota twara samo na sebi kaž tež wěstota za wobchad stej tuž chětro wohroženej. Směmy móst jenož potom wobstajnje dale wužiwać, hdyž nowy natwarimy“, Wojerowski nowinski rěčnik Bernd Wiemer w zdźělence rozłožuje. Zwuporjedźeć móst pak je po informacijach města njehospodarske, a za nowotwar pobrachuja pjenjezy. „Wojerecam kaž tež Kulowej njeje móžno srjedźodobne trěbne resursy za nowotwar mosta nałožić“, Wiemer potwjerdźa.