Poprawom chcyše Slepjanska gmejnska rada hižo spočatk januara swój hospodarski plan 2020 wobzamknyć. Tehdy pak bě hišće wjele wotewrjenych prašenjow. Nětko su je na wurjadnym posedźenju parlamenta rozrisali, při čimž je tež prawniski dohladowanski zarjad Zhorjelskeho wokrjesa ćišć wukonjał.
Slepo (CK/SN). Hač do lěta 2023 chce gmejna Slepo energijowy koncept zdźěłać, wukony komunalneho twarskeho zawoda z gmejnskeho wobłuka wuspinkować a wudawki za turizm a kulturu „zasadnje přepruwować“. To su jeno tři z cyłeje lisćiny naprawow, z kotrymiž chce komuna přichodne lěta swoje financy lěpje rjadować.
