Bjerwałdski jězor bě stajnje přikład za wuwiće turizma w bywšim brunicowym rewěrje. Nětko ma tam tež přirodoškit wulku rólu hrać. Z tym pak njejsu wšitcy přezjedni.

Hamor (AK/SN). Wot Sakskeje krajneje direkcije žadane centralne přirodoškitne pasmo wosrjedź Bjerwałdskeho jězora Hamorska gmejna raznje wotpokaza. „To by přećiwo wšitkim planowanjam zašłych lět było, njesteji w brunicowym planje a by naše turistiske předewzaće poćežowało“, rjekny gmejnski projektowy koordinator za jězor Roman Krautz zawčerawšim na posedźenju Hamorskeje gmejnskeje rady.

Gmejna ma wulke wobmyslenja přećiwo wukazej krajneje direkcije wo wódnych čarach Bjerwałdskeho jězora a prosy wo rozmołwu. Po měnjenju radźićelow měli do naćiska zapřijeć wužiwanje wódnych lětadłow, surfowanje, wodoski, marathonowe płuwanje kaž tež rybarstwo a wudźenje. W tym zwisku pokaza Roman Krautz na wužiwanske zrěčenje z Łužiskej a srjedźoněmskej towaršnosću hórnistwoweho zarjadnistwa (LMBV). W nim žane škitne pasmo předwidźane njeje.