Dalši krok za škit kulturnych pomnikow w Chróšćanskej gmejnje
Chrósćicy (JK/SN). Hižo loni nazymu zaběraše so Chróšćanska gmejnska rada z naležnosću, kotraž njeje jenož za tamnišu gmejnu wažna, ale kotraž by tež druhe gmejny zarjadniskeho zwjazka Při Klóšterskej wodźe potrjechić móhła. W Chrósćicach buchu we wjacorych padach swjate křiže z dotalnych městnow přestajene abo zrumowane. Gmejna je wo tym hakle zhoniła, jako bě přepozdźe. Tež hdyž so při tym wo priwatne naležnosće jednaše a křiže na priwatnych ležownosćach stejachu, su wone a modlerske stołpy dźěl našeje kulturneje krajiny. Hdźež hižo njesteja, něšto pobrachuje a krajina wochudnje.