Wšědnje rozprawja policija wo zadobywanjach do wobchodow, rjemjeslniskich zawodow, hosćencow a druhdźe. Tež młodźinske kluby njejsu z toho wuzamknjene. W Radworskim pak so tajke pady nětko kopja
Radwor (pdź/SN). Mjeztym třeći raz w běhu poł lěta su so paduši do Radworskeho młodźinskeho kluba zadobyli. W nocy wot póndźele na wutoru zmóžnichu sej přez wokno přistup, wułamachu durje składa a pokradnychu tam pjenježnu kasetu. Samo při sćěnje připrawjeny trezor złóstnicy wottwarichu a tohorunja sobu wzachu. Jenož něšto hodźin do toho bě so Radworska młodźina hišće w klubje zetkała.
„Bohužel so přeco zaso ludźo do našeho zetkawanišća zadobudu“, zdźěli Dawid Wowčer, předsyda Radworskeho młodźinskeho kluba, kotryž přisłuša Domowinje. „Zo pak so złóstnistwa w poslednim času kopja, je wosebje mjerzace.“ W nocy wot 29. na 30. januara, potajkim hakle před dwěmaj njedźelomaj, běchu so njeznaći hižo do kluba zadobyli. Tež tehdy pokradnychu kasu młodźiny z poprawom derje škitaneho składu.