Steja za staršimi

pjatk, 06. měrca 2020
artikl hódnoćić
(0 )

Róžant (SN/JaW). Starši, kotřiž maja swoje dźěći za přichodny 5. lětnik na Ralbičanskej wyšej šuli přizjewjene, su wčera dźělny wuspěch žnjeli. Po nimale dwuhodźinskim wurjadnym klawsurnym pose­dźenju gmejnskeje rady Ralbicy­Róžant bě jasne: Gmejna steji za delanskimi a Kulowskimi staršimi.

Po zhromadźiznje z direktorkomaj Ral­bičanskeje zakładneje a wyšeje šule Andreju Liehnowej a Milenku Koberowej, zastupjerjom Krajneho zarjada za šulu a kubłanje (LaSuB) Bosćijom Handrikom a ze zastupjerkami staršich Birgit Su­cho­wej, Nicole Pilcowej a Dianu Fryčec-­Grim­­migowej rjekny wjesnjanosta Hubertus Ryćer (CDU) SN: „Gmejnska rada­ je za to, w Ralbicach wutworić dwě rja­dow­ni w nowym 5. lětniku, zo maja dźěći hromadźe wostać w rjadownjach, kaž su, njehladajo na ličby, kotrež budu pón­dźe­lu wozjewjene, a žane dźěćo do druheje šule njewotpokazać. Zběramy nětko argumenty, wutworić dwě rjadowni, a po­srědkujemy je kultusej a šulskemu za­rjadej. Stejimy kruće za našimi star­šimi a za našim kaž tež za Worklečanskim ku­bła­nišćom, zo na woběmaj dwě rjadowni w 5. lětniku wutworja.“ Jasny to signal do přichoda wobeju šulow.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND