Smochćicy (CRM/SN.) Lětuši póstny seminar w Smochčanskim Domje biskopa Bena zahaji so minjenu póndźelu pod titulom: „Kmane jeno za njedźelne narěče? Wjesołe poselstwo a jeho hódnoty“. Zarjadowarjo třoch ekumeniskich wječorow z přednoškami a diskusiju su nimo kubłanskeho domu w Smochćicach tež Ewangelsko-lutherski cyrkwinski wobwod Budyšin-Kamjenc, dekanat Budyšin a Towarstwo Cyrila a Metoda. Čłon předsydstwa TCM Tomaš Rječka přitomnych tuž serbsce a němsce powita. Tež nawoda domu Sebastian Kieslich je so słowa jimał. Młodostny Leo Čórlich z Budyšina pak poda k přednoškomaj přiměrjene hudźbne wobrubjenje.