W lěće 1997 bě wona Kulturne towarstwo Ćisk sobu załožiła. Za Serbski ewangelski domizniski dźeń we Wojerowskim regionje wona w přihotowanskim wuběrku sobu skutkuje. Na Wojerowskim serbskim drastowym forumje a k dalšim přiležnosćam je kompetentna hotowarniča. „Mi leži to praktiske. Jenož tón, kiž je z wutrobu pódla, móže woprawdźe něšto docpěć“, měni Birgit Zahrodnikowa. Wot 2014 angažuje so Ćišćanka we Wojerowskej přiradźe za serbske naležnosće.

„Serbskosć je moja druha identita“, Birgit Zahrodnikowa praji a wuzběhnje, „jenož, smy-li my Serbja sami aktiwni, móže naša kultura dale wobstać.“ W Ćisku je wona wotrostła. Dźědaj a wowce běštaj hišće wšědnje serbowałoj, wowce stej čas žiwjenja serbskej chodźiłoj. Na 9. polytechniskej wyšej šuli we Wojerecach je dźesać lět serbšćinu wuknyła. Samo kónčne pruwowanje złoži w serbšćinje. „A to z jedynku. Dźakowano swojim znajomosćam serbšćiny smědźach 1989 na swětowe hry do Koreje sobu jěć.“