Plahowarjo koni nimaja jenož w tydźenjach do jutrow wjele dźěła ze swojimi štyrinohačemi, ale wězo cyłe lěto. Jedyn z wažnych terminow bě minjenu njedźelu w Jěžowje pola Kamjenca.
Jěžow (BWe/SN). Najskerje bě to minjenu njedźelu poslednje zarjadowanje, kotrež je Moritzburgska kobłarnja na njewěsty čas přewjedła. Najebać coronawirus pak zajimowachu so tež serbscy plahowarjo za potencielnych nawoženjow swojich koni. Tych su nětko njedźelu w Jěžowje pola Grafec w jěchanskej hali za swoje kobły wupytali.
Hižo před měsacom su připušćaki z Moritzburga do konjenca w Brunowje za Kamjencom zaćahnyli. Hakle loni w juliju bě so tam cyła bróžeń wotpaliła. Mjeztym, rozłoži nawoda Brunowskeje wotnožki Moritzburgskeje kobłarnje Markus Wendt, je wšitko zaso tak daloko spřihotowane. W tym tydźenju hišće konjenc za kobły dotwarja. Kónc lěta ma potom cyle nowy konjenc hotowy być. Loni nastata škoda wučinja něhdźe 200 000 eurow.