Wupadnjenu mzdu zarunaja

štwórtk, 02. apryla 2020
artikl hódnoćić
(0 )

Krajna direkcija pomha tym, kotřiž dyrbja dźěći dla doma wostać

Budyšin (SN/MWj). Wot wutory, 31. měrca, přijimuje sakska krajna direkcija próstwy dźěłopřijimarjow, jim wupadnjenu mzdu zarunać, hdyž je pěstowarnja abo šula koronapandemije dla zawrjena. Zarunanju přizwola, hdyž staršej swoje dźěło zawrjeneho kubłanišća dla hižo wukonjeć njemóžetaj a za swoje dźěći žanu hinašu hladansku móžnosć nimataj, rěka w nowinskej zdźělence krajneje direkcije.

„Wjeselu so, zo móžemy mnohim po­trjechenym staršim z nowym rjadowanjom pomhać. Wupadnjena mzda pandemije dla potrjechene swójby wulce poćežuje. Tež samostatni móža tele rjadowanje wužiwać, štož drje jim w tak a tak hižo ćežkim času derje pomha“, praji prezidentka krajneje direkcije Regina Kraushaar.

Zarunać mzdu přizwola sakska krajna direkcija staršim za dźěći, kotrež njejsu hišće dwanate žiwjenske lěto docpěli. We wuwzaćnych padach móže dźěćo tež starše być, je-li wone zbrašene a na pomoc pokazane. Nimo toho dyrbjeli wšitke druhe móžnosće wučerpane być, zo hodźała so mzda dale płaćić, na přikład nadhodźiny wotbyć. Kaž w nowinskej zdźělence dale rěka, je zarunanje mzdy na maksimalnje šěsć tydźenjow wobmjezowane. Potrjecheni dóstanu 67 procentow swojeje netto-mzdy, za połny měsac pak maksimalnje 2 016 eurow. Kóžda swójba smě jenož jednu próstwu wo tajku pomoc stajić. Wot sedmeho tydźenja zaruna krajna direkcija wupadnjenu mzdu we wobjimje chorobneho pjenjeza. Ma-li něchtó dale přidatne dochody, na přikład z wukonow bjezdźěłnostneho zawěsćenja, móža zarunanje mzdy w tej wysokosći přikrótšić.

Wšitke nadrobnosće próstwu nastupajo a trěbne formulary nadeńdu zajimcy na internetnej stronje sakskeje krajneje direkcije na portalu „Nutřkowne, socialne a strowota“ pod hesłom infek­ciski škit. Mjez druhim tam tež zhonja, zo za přistajenych dźěłopřijimarjow najprjedy raz dźěłodawar wupadnjenu mzdu dale płaći a ju pozdźišo wot krajneje direkcije wróćenu dóstanje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND