Składu 300 kilometrow kabla

štwórtk, 07. meje 2020
artikl hódnoćić
(0 )

Wobydlerjo Kulowa dóstanu hač do kónca lěta přistup k spěšnemu internetej. W juniju chcedźa tam z trěbnymi twarskimi naprawami za kładźenje podzemskich kablow započeć.

Kulow (AK/SN). Přichodny měsac započnu w Kulowje modernu šěrokopasmowu techniku za spěšny internet wutwarjeć. To podšmórny zastupowacy nawoda twarskeho zarjada města Kulowa Jurij Brösan na wčerawšim wuradźowanju měšćanskeje rady. „Trěbne twarske dźěła ma hłubokotwarska firma z Berlina přewzać. To je wuslědk wupisanja nadawkow za projekt po wšej Europje“, wón radźićelam nadrobnje rozłoži. „Wot naprawow potrjecheni wobsedźerjo ležownosćow su hižo wo přewjedźenju projekta wobhonjeni. Krótko do spočatka dźěłow pak jich hišće raz telefonisce informujemy. Tak maja woni składnosć prašenja stajeć, dyrbjeli-li hišće někajke njejasnosće być.“

Kaž sobudźěłaćer města Jurij Brösan Kulowskim radźićelam dale rozjasni, budu tři do štyri twarske skupiny ze stajnje pjeć ludźimi w měsće trěbne dźěła wukonjeć. Při tym budu wobydlerjo z tym abo tamnym poćežowanjom wu­twara spěšneho interneta dla ličić dyrbjeć. Mjez druhim dyrbja za to z městnami chódniki dźělnje abo dospołnje zawrěć. „Chcemy pak planowanje a zwoprawdźenje twarskich naprawow tak přihotować, zo wostanu dróhi a chódniki města přewažnje dale wužiwajomne. Nimo toho na to kedźbujemy, zo firma wšitke dźěła porjadnje wukonja a zwoprawdźa. Tema wutwar šěrokopasmoweje internetneje syće budźe nas tuž znajmjeńša poł lěta widźomnje zaběrać.“

Kaž na wčerawšim posedźenju Kulowskeje měšćanskeje rady, kotrež přewjedźechu po postajenjach k škitej koronawirusa dla z trěbnym wěstotnym wotstawkom mjez radźićelemi, dale zdźělichu, potrjechi twarski projekt cyłkownje 920 ležownosćow z 1 220 domjacnosćemi. Tam dóstanu wobydlerjo přizamk za spěšny internet z přenošowanskej ratu jednoho gigabyta na sekundu. Runo­časnje přizamknu syći 90 předewzaćow, zawodow a samostatnych. „Jeničce w měsće je za to 40 kilometrow hłubokotwarskich dźěłow trěbnych“, mjenowaše Jurij Brösan najwažniše fakty a ličby. „Cyłkownje dyrbja w Kulowje 300 kilometrow škleńčnonićoweho kabla skłasć a trjebaja 45 rozdźělakow.“

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND